سەرۆک مەعسوم پێشوازیی دەکات لە سەرۆک وەزیری چیک

2017/08/27
34 بینراو


ئەمڕۆ یەک شەممە ٢٠١٧/٨/٢٧ بەڕێز سەرۆک کۆمار دکتۆر فوئاد مەعسوم لە کۆشکی سەلام لە بەغداد پێشوازیکرد لە بەڕێز بۆهۆسلاڤ سۆبۆتکا سەرۆک وەزیری کۆماری چیک کە سەرەتا پیرۆزبایی پێشکەش بە بەڕێزیان کرد بە بۆنەی سەرکەوتنەکانی عێراق بەسەر تێرۆر و رزگارکردنی شاری موسڵ. لە دیدارەکەدا گفتوگۆ کرا لەبارەی گۆڕانکارییە سیاسیی و ئەمنییەکانی جێی بایەخی هەردو وڵات و پەیوەندیی مێژویی نێوان هەردو گەلی دۆست و رێوشوێنەکانی برەو پێدان و بەهێزکردنیان لە هەمو ئاستەکاندا، تا ببێتە پاڵپشتێک بۆ خێرایی لە ئیمزا کردنی رێککەوتن و یادداشتەکانی لێک تێگەیشتنی نێوان هەردو وڵات.
سەرۆک مەعسوم یارمەتیە مرۆیی و سەربازییەکانی چیکی بۆ عێراقی بەرز نرخاند، گرنگیی ئەو پەیوەندییانەیشی دوپاتکردەوە کە لە ئاستەکانی بازرگانیی، پیشەسازیی، سەربازیی و روناکبیرییدا هەردو وڵات پێکەوە دەبەستێتەوە، بایەخی فراوانکردنی هاریکایی دوقۆڵیی خستەرو بەو جۆرەی خزمەتی بەرژەوەندیی هاوبەش دەکات، داوایشی لە کۆمپانیاکانی چیک کرد بەشداربن لە پلانی سەرلەنوێ ئاوەدانکردنەوەی عێراق بە تایبەتیی لە ناوچە رزگاربوەکانی بن چنگی تێرۆر، هاوکات داوای لە حکومەتی چیک کرد لە پاشماوەی ئەو قەرزانەی خۆش بێت کە لەسەر عێراق ماون.
بەڕێزیان ئەوەشی خستە رو کە عێراق گرنگیی دەدات بە سود وەرگرتن لە شارەزاییەکانی چیک لە بواری دروستکردن و دامەزراندنی پاڵاوتگە و گەشەپێدانی پیشەسازیی نەوت و گاز و پیشەسازییە قورسەکانی تر بەتایبەتیی بەرهەمهێنانی ئامێری کشتوکاڵ و پیشەسازیی ئۆتۆمبیل و لێدانی جادە و رێگاوبان.
سەرۆک کۆمار دوپاتیکردەوە عێراقییەکان توانای خۆیان بۆ هەمو جیهانیان سەلماند لە بەگژاچونەوەی تێرۆر و لەناوبردنی بە یەکجارەکیی لە هەمو ئاستەکاندا، سەرباری سوربونیان لەسەر کارکردن بۆ بنیاتنانی عێراقی ئازاد و پێشکەوتو و چەسپاندنی ئاسایش و ئۆقرەیی لە وڵاتدا.
بەڕێزیان ئەوەیشی بەبیر هێنایەوە کە عێراق هەنگاو دەنێت بۆ سەرلەنوێ ئاوەدانکردنەوەی ئەوەی کە بەهۆی داگیرکاریی تاقمی داعشی تێرۆریستەوە زیانی بەرکەوتوە، لەو روەشەوە گرنگیی پاڵپشتیکردنی دەوڵەتانی دۆستی خستەرو لە پرۆژەکانی گەشەپێدانی ژێرخانی ئابوریی و پەرەپێدان و گەشەکردنی پیشەسازیی و کشتوکاڵ.
بەڕێز بۆهۆسلاڤ سۆبۆتکا سەرۆک وەزیری کۆماری چیکیش هەوڵ و تەقەلای وڵاتەکەی دوپاتکردەوە بۆ دامەزراندنی باشترین پەیوەندیی لەگەڵ عێراق و کردنەوەی ئاسۆیەکی نوێ لەبەردەم هاریکاریی پڕ بەرهەم، پابەندبونی وڵاتەکەیشی نوێکردەوە بۆ پشتگیریکردنی عێراق، بەتایبەتیی لە جەنگەکەیدا دژی تێرۆر، خواستی کۆمپانیاکانی چیکیشی خستەرو بۆ بەشداریکردن لە ئاوەدانکردنەوەی عێراقدا، لەو بارەیەوە ئاماژەیکرد کە حکومەتەکەی ئامادەی هاریکاریی فراوانترە لە هەمو بوارەکاندا.


Presedent

هەواڵی پەیوەندیدار

هەڵبژاردە

رۆژمێری چالاکیەکان