لەمیانی ئاڕاستەکردنی پڕۆژەیاسای (گێڕانەوەی پارە بەتاڵانبراوەكانی گەندەڵی).. سەرۆک بەرھەم: گەندەڵی دەبێت کۆتایی بێت و پارە دزرا و بەتاڵانبراوەکان بگێڕینەوە، ھەروەک گرنگە ھاوپەیمانی نێودەوڵەتی بۆ بەگژاچوونەوەی گەندەڵی پێکبھێنرێت

2021/05/23

•سەرۆک کۆمار: پارە بەتاڵانبراوەكانی گەندەڵی سەرچاوەی سەرەكی ئابووری سیاسیی تیرۆرە.

•سەرۆک بەرھەم : گەندەڵی و تیرۆر دوو دیوی یەك دراون و تەواوکەری یەکدی و خزمەتی یەکتر دەكەن و بەردەوامی بە یەكتری دەدەن. 

د. بەرھەم ساڵح، سەرۆک کۆماری عێراق ئەمڕۆ یەکشەممە ٢٠٢١/٥/٢٣ لەمیانی پێشکەشکردنی وتارێک لەبارەی ئاڕاستەکردنی پڕۆژەیاسای (گێڕانەوەی پارە بەتاڵانبراوەكانی گەندەڵی) بۆ ئەنجومەنی نوێنەرانی عێراق وەک ھەنگاوێک بۆ ریشەکێشکردنی گەندەڵی و گەڕانەوەی پارە بەتاڵانبراوەکانی عێراق بۆ دەرەوەی وڵات و رووبەڕوو کردنەوەی گەندەڵکاران بۆ بەردەم دادگا رایگەیاند؛ پڕۆژەیاساكە رێوشوێنی کرداری تووند لەخۆدەگرێت، دواتریش هەنگاوی دیكەی بەدوادا دێن بە مەبەستی گێڕانەوەی ئەو پارانەی بەتاڵانبراون.

سەرۆک کۆمار ئاشکرای کرد، ئەم پڕۆژەیاسایە لە رێگەی مۆركردنی رێككەوتننامە لەگەڵ دەوڵەتان و برەودان بە هاریكاری و هەماهەنگی لەگەڵ رێكخراو و لایەنە پەیوەندیدارە نێودەوڵەتییە تایبەتمەندەكان و سودوەرگرتن لە ئەزموونە جیهانییەكان، كۆششی ئەوە دەكات ئەو پارە بەتاڵانبراوانە بگێڕێتەوە و سنوورێكیش بۆ گەندەڵی و گەندەڵكاران دابنێت.

سەرۆک بەرھەم دووپاتیکردەوە لەگرنگی پێکھێنانی هاوپەیمانییەكی نێودەوڵەتی بە هەمان شێوەی هاوپەیمانی نێودەوڵەتی دژ بە داعش بۆ بەگژاچوونەوەی گەندەڵی، راشیگەیاند ئاشکرایە پارە بەتاڵانبراوەكانی گەندەڵی سەرچاوەی سەرەكی ئابووری سیاسیی توندوتیژییە، ھەروەک روونە گەندەڵی و تیرۆر دوو دیوی یەك دراون و تەواوکەری یەکدی و خزمەتی یەکتر دەكەن و بەردەوامی بە یەكتری دەدەن. 

ھاوکات سەرۆک کۆمار جەختیکردەوە دۆخی ناهەمواری ئێستای وڵاتەكەمان ئەركی ئەوەمان دەخاتە ئەستۆ كە سەرجەم دامەزراوە فەرمییەکان و چالاكییە كۆمەڵایەتی و مەدەنییەکان، سووربین و هەڵوێستەیەكی جددیمان هەبێت لە بەرامبەر ئەو دیاردە مەترسیدارەدا و خەمساردی لێ نەكەین و بەردەوامی بە پڕۆسەی چاكسازییەكی راستەقینە بدەین، بەو ئامانجەی دەوڵەتێكی تواناداری خاوەن سەوەری بونیات بنێین كە لە خزمەت هاووڵاتییەكانی بێت.

دەقی وتارەکەی سەرۆک کۆمار:

بە ناوی خودای گەورە و میهرەبان

پڕۆژەیاسای (گێڕانەوەی پارە بەتاڵانبراوەكانی گەندەڵی) ئاڕاستەی ئەنجومەنی نوێنەرانی عێراق کرد، پڕۆژەیاساكە برەو بە پەرەپێدانی كاری دەوڵەتی عێراق دەدات لە گێڕانەوەی پارە بەتاڵانبراوەكانی گەندەڵی و لێپێچینەوەی گەندەڵكاران و پەلكێشكردنیان بۆ بەردەم دادگا، ئومێدەوارم ئەنجومەنی نوێنەران تاوتوێی پرۆژەیاساکە بكات و بە سەرنج و تێبینییەكانیان دەوڵەمەندی بكەن، دواتر پەسەندی بكات، بەو ئامانجەی ئەم پرۆژەیاسایە یارمەتی دەربێت بۆ رێشەكێشکردنی ئەو دیاردە مەترسیدارە و سنوورێك بۆ گەندەڵكاران دابنێین كە ساڵانێكی دوورودرێژە گەلی عێراقیان لە خێروبێری وڵاتەكەیان بێبەشكردووە.

پڕۆژەیاساكە رێوشوێنی کرداری تووند لەخۆدەگرێت، دواتریش هەنگاوی دیكەی بەدوادا دێن بە مەبەستی گێڕانەوەی ئەو پارانەی بەتاڵانبراون، تاوەکو تەواوكەری هەوڵ و كۆششی سیستەمی یاسایی و دامەزراوە پەیوندیدارەكان بێت بۆ بەرگرتن لەو پەتا مەترسیدارە، ھەروەھا ھاوکار بێت بۆ دەستەبەركردنی پشتیوانی بۆ هەوڵ و كۆششەكانی دامەزراوە دارایی و چاودێرییەكان و كاراكردنی میكانیزمەكانی كاركردنیان، بەو ئامانجەی لە كاریگەرییە خراپەكانی ئەو دیاردە قێزەوونە كەمكەینەوە كە هەڕەشە لە ئێستا و ئایندەی وڵاتەكەمان دەكات.

لە ساڵانی رابردوودا وڵاتەكەمان رووبەڕووی دیاردەی گەندەڵی بووەتەوە كە پەیوەندی و رایەڵەیەكی پتەوی لەگەڵ تیرۆر و توندوتیژیدا هەیە، بە هیمەت و خواستی پۆڵاینی گەل و قوربانیدانی سەرجەم پێکھاتە جۆراوجۆرەكانی هێزە چەكدارەكان، توانیمان لە رووی سەربازییەوە بەرەنگاری تیرۆر ببینەوە و بەسەریدا سەركەوین، رووبەڕووبوونەوەی گەندەڵیش هیچی كەمتر نییە لە تیرۆر، چونكە گەندەڵی بەردەوامی بە توندوتیژی و پەرتەوازەیی دەدات و هەڕەشە لە ئاشتی كۆمەڵایەتی دەكات، بگرە كاریگەرییەكی زۆر خراپی هەیە لەسەر خواستی ئازادی و بڕیاری راستەقینەی خەڵک.

گەندەڵی پەتایەكی بێ سنوورە، بەهۆی ئەو پەتا مەترسیدارەوە ملیارەها دۆلاری وڵاتەكەمان بەفیڕۆ چووە، داتا و ئامارە حكومی و نێودەوڵەتییەكان مەزەندی ئەوەیان كردووە كە كۆی داهاتە نەوتییەكانی عێراق لە ساڵی 2003 وە تاوەکو ئێستا نزیكەی هەزار ملیار دۆلارە، چەند ئاماژە و پێودانگێكیش مەزەندەی ئەوە دەكەن بەلایەنی كەمەوە 150 ملیار دۆلاری ئەو پارەیە بەهۆی سەودا و مامەڵەكانی گەندەڵییەوە بەقاچاخ براوەتە دەرەوەی عێراق.

ئەو بڕە پارە بەتاڵانبراوە بەس بوو بۆ باشتركردنی دۆخی وڵات، ناكرێت تەنها لەسەر ئاستی ناوخۆیی رووبەڕووی دیاردەكە ببینەوە، بۆیە ئەم پڕۆژەیاسایە لە رێگەی مۆركردنی رێككەوتننامە لەگەڵ دەوڵەتان و برەودان بە هاریكاری و هەماهەنگی لەگەڵ رێكخراو و لایەنە پەیوەندیدارە نێودەوڵەتییە تایبەتمەندەكان و سودوەرگرتن لە ئەزموونە جیهانییەكان، كۆششی ئەوە دەكات ئەو پارە بەتاڵانبراوانە بگێڕێتەوە و سنوورێكیش بۆ گەندەڵی و گەندەڵكاران دابنێت.

لێرەوە ئەو داواكارییەی دووپاتدەكەمەوە كە پێشتریش خستومەتە بەردەم كۆمەڵەی گشتی نەتەوە یەكگرتووەكان، بەوەی هاوپەیمانییەكی نێودەوڵەتی بە هەمان شێوەی هاوپەیمانی نێودەوڵەتی دژ بە داعش بۆ بەگژاچوونەوەی گەندەڵی پێکبھێندرێت، چونکە ناتوانین بەسەر تیرۆردا سەركەوین، ئەگەر سەرچاوەی داراییەكانی ووشك نەكەین، ئاشکرایە پارە بەتاڵانبراوەكانی گەندەڵی سەرچاوەی سەرەكی ئابووری سیاسیی توندوتیژییە، ھەروەک روونە گەندەڵی و تیرۆر دوو دیوی یەك دراون و تەواوکەری یەکدی و خزمەتی یەکتر دەكەن و بەردەوامی بە یەكتری دەدەن. 

گەندەڵی دوژمنی پڕۆسەی پەرەپێدانی ئابووری و كۆمەڵایەتییە، بژێوی و قوتی خەڵک بەتاڵان دەبات، خواستی راستەقینەی گەل لە بونیادنان و پێشكەوتن پەكدەخات، رێگریش دەکات لە دەرفەتی بەھێزکردنی پەرەپێدان و پێشكەوتن، هەر بەھۆی گەندەڵییەوە ئاپۆڕای گەنجانی ناڕازی وڵاتەكەمان هاتنەسەر شەقام و وتیان "نیشتمانمان دەوێت".. نیشتمانێك دوور بێت لە گەندەڵی، سامان و دەرامەتەكانی پارێزراوبن و لە خزمەتی خەڵك و شكۆمەندی وڵاتدا بێت.

دۆخی ناهەمواری ئێستای وڵاتەكەمان ئەركی ئەوەمان دەخاتە ئەستۆ كە سەرجەم دامەزراوە فەرمییەکان و چالاكییە كۆمەڵایەتی و مەدەنییەکان، سووربین و هەڵوێستەیەكی جددیمان هەبێت لە بەرامبەر ئەو دیاردە مەترسیدارەدا و خەمساری لی نەكەین و بەردەوامی بە پڕۆسەی چاكسازییەكی راستەقینە بدەین، بەو ئامانجەی دەوڵەتێكی تواناداری خاوەن سەوەری بونیات بنێین كە لە خزمەت هاووڵاتییەكانی بێت.   

هێنانەدی ئەم ئامانجە باڵایە مەزنترین رێزلێنانە لە قوربانیدانی شەهیدانی وڵاتەكەمان. گەلی عێراق شایستەی خزمەتكردنی زیاترن، ئەوان لە پێناو هێنانەدی ژیانێكی شكۆمەندانە بۆ سەرجەم رۆڵەكانی نیشتمان و ئایندەیەكی گەشتر لە ئێستا، قوربانی زۆریان داوە.

لە كۆتایدا بە خودای گەورە و میهرەبانتان دەسپێرم ھەمیشە ھەر شاد بن..

Presedent

هەڵبژاردە