سەرۆک کۆمار پێویستی گەشەپێدانی کەرتی تایبەت و پشتگیریکردنی ئابووری نیشتمانی دووپات دەکاتەوە

2018/12/05
19 بینراو


بەڕێز سەرۆک کۆمار د. بەرهەم ساڵح داوای لە سه‌رمایه‌دار و کەرتی تایبەت کرد رۆڵی دیار و بەرچاو ببینن لە پاڵپشتیکردنی ئابووری نیشتمانی، هاوکات بە شێوه‌یه‌كی کاریگەر بەشداری بکەن لە گەشەپێدانی تەواوی پرۆژەکانی ئاوەدانی و وەبەرهێنان لە سەرتاسەری وڵاتدا.

ئەمڕۆ چوارشەممە ٢٠١٨/١٢/٥ له‌ میانه‌ی پێشوازیکردنی له‌ بەڕێز ئیبراهیم ئەلمەسعودی (ئەلبەغدادی) سەرۆکی ئەنجومەنی ئابووری عێراق و ئەندامانی ئەنجومەنەکە، سەرۆک کۆمار گوتی کە پێویستە سه‌رمایه‌داره‌كان و خاوەن بانک و بازرگانەکانی کەرتی تایبەت بایەخ بدەن بە پرۆژە گەورەکانی وەبەرهێنان، له‌ بوارەکانی کشتوکاڵ و وزە و پیشەسازیی وەک رستن و چنینن و جلو بەرگ.
 
لە دیدارەکەدا کە لە کۆشکی سەلام لە بەغداد بەڕێوەچوو، سەرۆک بەرهەم ساڵح دۆزینەوە و دانانی رێوشوێنی پێویستی دووپاتکردەوە بۆ پەرەپێدانی تواناکانی ئەنجومەنی ئابووری عێراق تا بتوانێت بە شێوەیەکی کاراتر ئابووری نیشتمانی بەرەو پێش ببات، بەڕێزیان ئەوەشی روونکردەوە پشتیوانی ده‌كات لە دەستەبەرکردنی هەموو ئاسانکارییەکی یاسای بۆ ئەوەی دەرفەت بڕه‌خسێت بۆ ئەنجومەنەکە بەو ئامانجەی کارەکانی بە باشی رابپەڕێنێت، هەروەها ئەو ئاستەنگانە تێپەڕ بکات کە دێنە رێی جێبەجێکردنی پرۆژەکانی وەبەرهێنان لە وڵاتدا.

لای خۆیانه‌وه‌ سەرۆک و ئەندامانی ئەنجومەنی ئابووری عێراق بە چڕی ئەو کۆسپ و تەگەرانەیان خستەرو کە دێنە بەردەم کارەکانی کەرتی تایبەت، لەو روەوە چەند رێگە چارەیەکی گونجاویان پێشکەشکرد بۆ لابردنی کۆسپەکانی بەردەم پلانی داهاتوو کە ئەنجومەنەکە بە باشی دەزانێت لە ئایندە پشتی پێ ببەستێت.

لە بەشێکی تری قسەکانیاندا ئەندامانی وەفدی میوان هەوڵەکانی بەڕێز سەرۆک کۆماریان بەرز نرخاند لە گەشەپێدانی میکانیزمی کارەکان لە چوارچێوەی دامەزراوە نیشتمانییەکاندا به‌ گشت پسپۆڕییە جیا جیاکانیانەوە لە پێناوی دابینکردنی باشترین خزمەتگوزاری بۆ رۆڵەکانی گەلی عێراق و ژیانەوەی باری ئابووری لە وڵاتدا.


Presedent

هەواڵی پەیوەندیدار

هەڵبژاردە

رۆژمێری چالاکیەکان