لە ساڵڕۆژی ئەو تاوانە گەورەیەیی کە دەرهەق بە ئێزدییەكان ئەنجامدرا... سەرۆك كۆمار: ئەمڕۆ بیرەوەرییەكی تاڵ و ئازار بەخش بە بیردێنینەوەو چاوەروانین کە پرۆژە یاسای ڕزگاربووانی ژنان و کچانی ئێزیدی لە پەرلەمان پەسەند بکرێت

2019/08/03


سەرۆك كۆمار د. بەرهەم ساڵح دووپاتیكردەوە ئەو كۆمەڵكوژییەی كە داعشی تێرویست دەرهەق بە ئێزدییەكان ئەنجامیدا، لاپەڕەیەكی ڕەش و ئازار بەخشە كە گوزارشت لە ھزری توندڕەوی و تاوان و بیری خوێناوی ئەو تاقمە توندڕەوە دەكات.

سەرۆك كۆمار لەو بروسكەیەدا كە ئەمڕۆ ٢٠١٩/٨/٣ ئاڕاستەی ئیزدییەكانی كرد لە ساڵڕۆژی پێنجەمین بیرەوەری تاڵی كۆمەڵكوژی كردنی ئێزدییەكان ئاماژەی كردووە بەوەی لە چاوەڕوانی سەرۆكایەتی و ئەنجومەنی نوێنەرانین بۆ ئەوەی پەلە بكەن لە پەسەندكرنی پرۆژە یاسای ڕزگاربووانی ئێزدییەکان كە لە ٢٠١٩/٣/٢٨ سەرۆكایەتی كۆمار ئامادەیکردووە لە پێناو قەرەبووکردنەوەی مادی و مەعنەوی و پاراستنی مافەکانی ژنانی رزگاربووی ئێزدی.

ئەمەش دەقی بروسكەكەیە:

ئەمرۆ پێنجەمین ساڵڕۆژی بیرەوەری تاڵی كۆمەڵكوژی ئێزدییەكانە لە سەر دەستی تاقمی داعشی تیرۆریستی دەكەینەوە كە بە قێزەونترین تاوانی مرۆڤایەتی دادەنرێت، کە رۆڵەكانی گەلەكەمان لە ئاینی ئێزدی بەر شاڵاوی قەڵاچۆكردن و كوشتن و ڕفاندنی بە كۆمەڵ بوونەوە و لە بازاڕ کرین و فرۆشتنیان پێوە کراو  بە زۆرە ملێ‌ دەربەدەر و ئاوارە کران.

ئەمڕۆ یادەوەری تاوانێكی قێزەون و تاڵ و ئازار بەخشيی ئەو كۆمەڵكوژییە پڕ ئازار و ویژدان هەژێنە دەكەینەوە كە جیاوازی نەكرد لە نێوان پیاو و ژن و گەورە و بچوکدا كە گوزارشتێکی روون بوو لە پەیڕەوکردنی ھزری تاوانی تەكفیری ئەو تاقمە توندڕەوە بۆ ڕشتنی خوێنی زیاتر و دروستكردنی ترس و تۆقاندن لەناخی هاووڵاتیانی مەدەنی بێ‌ تاوان.

چاوەڕوانی سەرۆكایەتی و ئەندامانی ئەنجومەنی نوێنەرانین بۆ ئەوەی پەلە بكەن لە پەسەندكردنی پرۆژە یاسای رزگاربووانی ژنان و کچانی ئێزدییەکان كە لە ٢٠١٩/٣/٢٨ نێردراوە دوای ئەوەی لەلایەن سەرۆكایەتی كۆمارەوە ئامادە کرا لە پێناو دەستەبەرکردنی مافە ڕەواكانی رزگاربووانی ئێزدی و قەربووكردنەوەی مادی و مەعنەویان.

ئەركی مرۆڤایەتی و نیشتمانی، داوا لە ئێمە و تەواوی وڵاتانی برا و دۆست و ڕێکخراوە نێودەوڵەتییەكان دەكات بۆ ئەوەی هەوڵی زیاتر بخرێتە گەڕ بۆ دیاریكردنی چارەنوسی نزیكەی سێ هەزار رفێنراوی ئێزدی لە چنگی داعش و پێویستی كاركردنی خێرا بۆ ئازاد كردنیان و گێڕانەوەی خەندە و خۆشی بۆ كەسوكاریان و گەڕانەوەیان بە سەلامەتی بۆ لای كەسوكاریان.

داواكارین لە کۆمەڵگەی نێودەوڵەتیش كە لێپێچینەوە بكات لە گروپی داعش لە بەرامبەر ئەو تاوانانەی لە عێراق ئەنجامیان داوە بە تایبەت ئەو تاوانانەی كە بە تاوانی جەنگ و تاوانی دژ بە مرۆڤایەتی و كۆمەڵكوژی دادەنرێن بەگوێرەی بڕیاری ئەنجومەنی ئاسایشی ژمارە (٢٣٧٩) ی ساڵی (٢٠١٧) كە زامنی دووبارە نەبوونەوەی كۆمەڵكوژی لەو جۆرە بكات.

بەو پەڕی شانازی و رێزەوە ئەو قوربانیدانە گەورەی كە رۆڵەكانی گەلەكەمان لە ئاینزای ئێزدی لە جەنگی دژ بە گروپی داعشی تێروریستی بەخشیویانەو ئازایەتی و ئارامیان کە بۆ بەرگەگرتنی ئەو كارەسات و تاوانە قێزەونەی دەرهەقیان كرا بەرز دەنرخێنین.

نەمری بۆ گیانی شەهیدانی ئێزدی و شەهیدانی تاوانی ئەنفال و گۆرە بەكۆمەڵەكان و شەهیدانی دەستی تێرور.


د. بەرهەم ساڵح 
سەرۆك كۆمار
Presedent

هەواڵی پەیوەندیدار

هەڵبژاردە

رۆژمێری چالاکیەکان