دوای پەسەندکردنی لەلایەن ئەنجومەنی وەزیرانەوە پرۆژە یاسای ئەنجومەنی بنیادنانەوە رەوانەی پەرلەمان دەکرێت

2019/09/17


ئەمڕۆ سێ شەممە ٢٠١٩/٩/١٧ ئەنجومەنی وەزیران لە میانی دانیشتنی هەفتانەی خۆیدا پڕۆژەی یاسای ئەنجومەنی بنیادنانەوەی پەسەندکرد بۆ ئەوەی پێشکەش بە ئەنجومەنی نوێنەران بکرێت، ئەو پرۆژە یاسایە بە هاوبەشی لەنێوان سەرۆکایەتی کۆمارو ئەنجومەنی وەزیران ئامادەکرابوو بەسود وەرگرتن لە راوێژی ژمارەیەک لە پسپۆڕان و خاوەن تواناکانی ئەو بوارە، ئامانجی لە پرۆژە یاساکە بریتییە لە بنیادنانی ژێرخانی ئابوری و دەستپێکردنی پرۆژەی گەورە لە وڵاتدا وەک رێگاوبان و پردو فڕۆکەخانەو پرۆژەکانی تر، هاوکات رۆڵیکی کاریگەر دەبینێت لە نەهێشتنی بێ کاری ئەویش لەرێگەی هاندانی وەبەرهێنان و خستنەگەڕی دەستی کار لەگەڵ چاودێریکردنی بنیادنانی پرۆژەی ستراتیژی و پیشەسازی و کشتوکاڵی و تەندروستی و نیشتەجێبوون و بەردەوامیدان بەو پڕۆژانە بەگوێرەی پێوەرو پێودانگە نێودەوڵەتییەکان.

پرۆژەی ئەنجومەنی بنیادنانەوە دەسەڵاتی فراوانی پێ ئەدرێت بۆ ئەوەی چاودێری و سەرپەرشتی پرۆژەکان بکات و بەڕێوەیان بەرێت و جێبەجێشیان بکات، هاوکات دەرفەتی کار بڕەخسێنێت و ببێتە مایەی ئەوەی کە هاووڵاتیانی عیراقی سود لە داهاتەکانی دەوڵەت وەرگرن لە رێگەی دابەشکردنی سودی پرۆژەکان بەسەریاندا و ئەولەویەتیان پێ بدرێت بۆ ئەوەی لە پرۆژەکانی ئەنجومەنەکدا بەشداربن، هاوکات پرۆژەی گەشەپێدانی گرنگی ئابووری جێ بەجێبکەن بۆ ئەوەی پەرە بە داهاتەکانی عیراق بدەن لەرووی مادی و مرۆییەوە، هەروەها کەرتی کارای نیشتمانی دابمەزرێنن کە تیایدا کێ بڕکێی ئازاد بێنێتە کایەوەو پاڵنەرێکیش بێت بۆ گەشەپێدانی زیاتر.

پرۆژە یاساکە ئاماژە بۆ ئەوە دەکات کە ئەنجومەنی بنیادنانەوە پێک دێت لە سەرۆکی ئەنجومەنی وەزیران کە سەرۆکایەتی دەکات و بەڕێوەبەری جێبەجێکاری ئەنجومەنەکەش جێگری سەرۆک وەزیر سەرپەرشتی دەکات، هەروەها ئەندامێتی هەر یەک لە وەزارەتەکانی دارایی و نەوت و پلاندانان و ئەمیندارێتی گشتی ئەنجومەنی وەزیران لە خۆ دەگرێت، جگە لەوەش پێنج ئەندام لە کەرتی تایبەت و شارەزایانی کاروباری بنیادنانەوەو بەڕێوەبردنی پرۆژە گەورەکان و بنیادنانەوەو وەبەرهێنان دەبنە ئەندامی ئەو ئەنجومەنە.

پرۆژەکە ئەرکی ئەنجومەنەکە دیاری دەکات کە بریتییە لە گفتوگۆکردن بە گوێرەی پرەنسیبی کێبڕکێ و شەفافیەت و دادپەروەری و بەدیهێنانی زۆرترین قازانج یان گەشەپێدان لەگەڵ لایەنە عیراقییەکان یاخود بیانییەکان لەپێناو بەدیهێنانی ئامانجەکانی ئەو ئەنجومەنە، لەلایەکی تریشەوە کارکردن لەگەڵ رێکخراوە نێودەوڵەتی و کۆمپانیا خاوەن پسپۆڕی و نێودەوڵەتییەکان بۆ ئەوەی توێژینەوەو دیزاین و نموونەی خۆیان پێشکەش بکەن تا لە گرێبەست و بەڵگەنامەو خزمەتگوزارییەکان جێگەیان بکرێتەوە کە پەیوەستن بە کاروباری ئەنجومەنەکە، هەروەها سیستەم و سیاسەت و پلان و بەرنامەو بڕیارەکان دابنێت کە وەزارەت و بەرێوەبەرایەتی و کەرتی تایبەت پەیوەست دەکات بە جێ بەجێکردنی، هەروەها پرۆژەکە ئەو دەسەڵاتە دەدات بە ئەنجومەنەکە کە مومارەسەی ئەرک و پسپۆڕی وەبەرهێنانی نیشتمانی بکات کە لەیاسای وەبەرهێنانی ژمارە ١٣ ی ساڵی ٢٠٠٦ دا هاتووە کە تایبەتن بە پرۆژەکانی ئەنجومەنەکە، هاوکات ئەنجومەنەکە دەسەڵاتی ئەوەی هەیە مۆڵەتی وەبەرهێنان بدات بەگوێرەی ئەو سیستەمەی کە ئەنجومەنەکە دەریدەکات.

هەر لە پرۆژە بڕیارەکەدا هاتووە کە ئەنجومەنەکە ئەرکی وەرگرتنی خستنەڕووی پرۆژەکان و شیکاری و لێکدانەوەی باشتریان بۆ جێبەجێدەکات، بۆ ئەوەی پرۆژەکان بەگوێرەی رێساکانی ئەم یاسایە و رێنماییەکانی جێ بەجێبکرێت.
Presedent

هەواڵی پەیوەندیدار

هەڵبژاردە

رۆژمێری چالاکیەکان