سەرۆک کۆمار وتارێکی ئاڕاستەی گەلانی عێراق کرد لە بارەی ڤایرۆسی کۆرۆناوە

2020/03/23

سەرۆک کۆمار د. بەرھەم ساڵح ئێوارەی ئەمرۆ دووشەممە ٢٠٢٠/٣/٢٣ لەبەغدا، وتارێکی ئاڕاستەی گەلانی عێراق کرد لە بارەی مەترسییەکانی ڤایرۆسی کۆرۆنا.

ئەمەش دەقی وتارەکەیەتی:

خوشك و برایان و ھاونیشتمانیانم... له‌ سەرتاسەری عێراق و ھەرێمی کوردستان
سڵاو و سه‌لامى په‌روه‌ردگارتان لێبێت

یادی پیرۆزی شەوڕۆی ( ئیسراو معراج) پێغەمبەری مه‌زنمان(د.خ) بەدەرفەت دەزانم، هه‌م پیرۆزبایتان لێ بكه‌م، هه‌م له‌ سه‌ر دواین گۆرانكارییه‌كان له‌گه‌ڵتاندا بدوێم، له‌ ئێستادا پێكه‌وه‌، ڕۆژانێك به‌ڕێده‌كه‌ین كه‌ ڕووبه‌رووى مه‌ترسی ڤایرۆسى كۆرۆنا بوینه‌ته‌‌وه‌، كه‌ ڕێکخراوى ته‌ندروستى جیهانى به‌ په‌تایه‌كى سه‌رتاسه‌رى وه‌سفی كردووه‌، به‌وه‌ی ڤایرۆسێكی بەڵایە‌ و‌ هه‌ڕه‌شه‌ له‌ مرۆڤایه‌تى ده‌كات، ئه‌مه‌ش ئاڵەنگارى خستووەته‌ به‌رده‌م ژیانى هاونیشتمانیان، به‌تایبه‌تی کەسانی بەته‌مه‌ن و ئه‌وانه‌ى نه‌خۆشى درێژخایه‌نیان هه‌یه‌.

له‌ چه‌ند هه‌فته‌ى ڕابردوودا، ماڵئاوایمان له‌و دۆست و ئازیزانه‌مان كرد، كه‌ تووشى ئه‌و ڤایرۆسه‌ بوون و تێداچوون، به‌ گوێرەی شانه‌ی قەیرانەکان كه‌ حكومه‌ت له‌ چوارچێوه‌ى فه‌رمانى دیوانى ژماره‌ (55) پێكیهێناوه‌، زۆربه‌ى ئه‌وانه‌ی تووشى ڤایرۆسه‌كه‌ بوون، له‌ ده‌ره‌وه‌ى عێراق تووشی بوون، داواكارین له‌ یه‌زدان کۆچکردووان به‌ر ڕه‌حمه‌تى خۆی بخات، دڵ و هه‌ستیشمان لای كه‌سوكار و خۆشه‌ویستانیانه‌.

جێگه‌ی ‌داخه‌ كه‌ له‌ چه‌ند ڕۆژى ڕابردوودا بینیمان، كه‌ تۆماری ژماره‌ی تووشبووان به‌شێوه‌یه‌كی به‌رچاو به‌رزبووەته‌وه‌، ئه‌مه‌ش له‌ ده‌رئه‌نجامى تێكه‌ڵابوون و دروستبوونى قه‌ره‌باڵغى له‌ شوێنه‌ گشتییه‌كان، گوێنه‌دانیش به‌ مه‌ترسى ئه‌و په‌تایه‌ و ده‌رئه‌نجامه‌كانی هاته‌كایه‌وه‌، سه‌ره‌ڕاى ئه‌وه‌ى ھەردوو‌ حكومه‌تى  ئیتحادی و حكومه‌تى هه‌رێمى كوردستان و ده‌سه‌ڵاتى پارێزگاكان، بۆ سنورداركردنى ژمارەی تووشبووان، چه‌ندین ڕێوشوێنى تایبه‌تیان گرته‌به‌ر؛ هه‌ر له‌ داخستنى سنوره‌كان، سه‌پاندنى قه‌ده‌غه‌ى هاتووچۆ، داخستنى شوێنه‌ گشتییه‌كان، بڵاوكردنه‌وه‌ى هۆشیارى پاك و خاوێنى، هاوكات مه‌رجه‌عیه‌ته‌ ئاینى و كه‌سایه‌تى سیاسى و كۆمه‌ڵایه‌تى و ڕۆشنبیرى و میدیاییه‌كان، به‌ سوپاسه‌وه‌ كاردانه‌وه‌یه‌كى زۆر باشیان هه‌بووە له‌ به‌رامبه‌ر دۆخه‌كه‌دا، له‌ ئێستاشدا چاوه‌ڕوانى هۆشیارى كۆمه‌ڵایه‌تى زیاترین له‌ باره‌ى پێویستى گرتنه‌به‌رى ڕێوشوێنی پێویست له‌ به‌رامبه‌ر ئه‌م په‌تا جیهانییه‌ و لێكه‌وته‌‌كانى، ئه‌مه‌ش ده‌بێت به‌‌ شێوه‌یه‌كى به‌رپرسیارانه‌ و له‌لایه‌ن هه‌مووانه‌وه‌ به‌بێ جیاوازى پیاده‌ بكرێت.
خۆشەویستان....
ئه‌ركى نیشتمانیمانه‌ كۆششه‌كانمان له‌ ئاستی قه‌یرانه‌كه‌دا بێت‌، دانیش به‌ودا بنێین كه‌ دۆخه‌ سه‌خته‌،‌ ئه‌گه‌ر پابه‌ندی ڕێنماییه‌كانى قه‌ده‌غه‌ى هاتووچۆ و گوێنه‌دان به‌ ڕێوشوێنەکانی‌ خۆپارێزییه‌ ته‌ندروستییه‌كان نه‌بین، له‌وانه‌یه‌ (پەنا بەخوا‌) مه‌ترسى زیاتریش دروست بێت، ده‌بێت‌ دان به‌و ڕاستیه‌شدا بنێین، كه‌ژێرخانى سێكته‌ری ته‌ندروستیمان له‌ دۆخێكى باشدا نییه‌، ئه‌مه‌ش‌ به‌رپرسیاریه‌تیمان بۆ تێپه‌ڕاندنی ئه‌م ته‌نگژه‌یی ئێستا  زیاتر ده‌كات.
بۆیه‌ داوا له‌ ته‌واوى هێزه‌ كۆمه‌ڵایه‌تییه‌كان، خۆشگوزه‌ران و سه‌رمایه‌دار‌ و ڕێکخراوه‌ په‌یوه‌ندیداره‌كان ده‌كه‌م، ئه‌وپه‌ڕى توانایى خۆیان بخه‌نه‌گه‌ر بۆ هاوكارى و هه‌ماهه‌نگى له‌گه‌ڵ دامه‌زراوه‌ فەرمییه‌ په‌یوه‌ندیداره‌كان، هاوشانى دامه‌زراوه‌كانى ده‌وڵه‌ت، ده‌ستپێشخه‌رى كۆمه‌ڵایه‌تى بنیادنه‌ر بخه‌نه‌ڕوو، ئه‌مه‌ش بۆ به‌ره‌نگاربوونه‌وه‌ى ئه‌م قه‌یرانه‌ى ئێستا، كه‌ به‌ پشتیوانی خودا به‌ كه‌مترین زه‌رر و زیان لێی ده‌رباز ده‌بین.
پێویسته‌ هه‌موومان  پێكه‌وه‌ هه‌ماهه‌نگبین له‌ دابینكردنى خۆراك و ته‌ندروستى بۆ ئه‌وانه‌ى پێویستیان پێیه‌تی‌ له‌ ڕۆڵه‌كانى گه‌له‌كه‌مان، ده‌زگاكانى ڕاگه‌یاندنیش ڕۆڵى سه‌ره‌كى و كارا بگێڕن له‌ جۆشدانى ده‌ستپێشخه‌رییه‌ مرۆییه‌كان، وه‌ك داواكاری بۆ كه‌مكردنه‌وه‌ى كاتی كرێی كرێنشینان و دابینكردنى پێداویستییه‌كان بۆ خێزانه‌ كه‌مده‌رامه‌ت و ئه‌وانه‌ى داهاتیان سنورداره‌، نابێت برا و خوشكه‌كانیشمان له‌ بیر بكه‌ین له‌ خێوه‌تگاكاندا كه‌ ساڵانێكه‌ به‌رگه‌ی ئێش و ئازاری ده‌ربه‌ده‌ریان گرتووه‌، ئه‌ركی ده‌وڵه‌ته‌ بیانگێڕێته‌وه‌ سه‌ر ماڵ و حاڵی خۆیان.
ئه‌م دۆخه‌ قورسه‌ وامان لێده‌كات وه‌ك گه‌لێكى خاوه‌ن ویست و جوامێر و ئارامگر، له‌ به‌رامبه‌ر ئاسته‌نگ و به‌ڵا و كاره‌ساته‌ جۆراوجۆره‌كان، هاوكار و یه‌كگرتوو بین،گه‌لی ئێمه‌ خاوه‌نى ئه‌زمونێكى مێژوویی و مرۆیى ڕه‌سه‌نه‌، كه‌ وایكردووه‌ به‌ درێژایى مێژوو بتوانێت ئاسته‌نگه‌كان تێپه‌ڕێنێت و به‌رده‌وامی به‌ ژیان بدات و به‌ ویستێكی به‌هێزیشه‌وه‌ پشكداری تێدا بكات.
ئه‌مرۆشمان هاوتای مێژووه‌ پڕشنگداره‌كه‌مان، گه‌له‌كه‌مان هه‌روه‌ك پێشتر سه‌لماندویه‌تى، جارێكى دیكه‌ش ده‌یسه‌لمێنێت، كه‌ به‌ به‌رده‌وامى نموونه‌یه‌كه‌ له‌ به‌رگه‌گرتن و تێگه‌یشتن و قوربانیدان له‌ به‌رده‌م ته‌نگه‌تاوی و ئاڵەنگارییه‌كاندا.
ئێمه‌ی عێراقی (‌عه‌ره‌ب و كورد و توركمان‌، موسوڵمان و مه‌سیحی و ئاین و ئاینزا و ته‌یافه‌كان‌، به‌رپرس و هاووڵاتی، ده‌وڵه‌مه‌ند و هه‌ژار، فه‌رمانبه‌ر و كرێكار و جوتیار، ژن و پیاو گه‌نج و منداڵ)، هه‌موومان له‌ به‌رده‌م ئه‌م به‌ڵا و كاره‌ساته‌دا یه‌ك ده‌ستین، جه‌نگی خۆمان دژ به‌و ڤایرۆسه‌ نه‌گریسه‌ ڕاده‌گه‌یه‌نین و به‌سه‌ریدا سه‌رده‌كه‌وین، جگه‌ له‌ هیواو و ئومێد و متمانه‌به‌خۆبوون، هیچ ڕێگه‌چاره‌یه‌كی دیكه‌مان‌ له‌ به‌رده‌مدا نییه‌.
ئازیزان...
ده‌بێت ووریایی و ڕێوشوێنه‌كانمان له‌ ئاست مه‌ترسیداری په‌تاكه‌دا بێت، نابێت خۆمان تووشی ترس و دڵه‌ڕاوكێ و پشێوی بكه‌ین، ده‌بێت پابه‌ندی ڕێوشوینه‌كانی خۆپارێزی و چاره‌سه‌ربین، هه‌روه‌ك مه‌رجه‌عیه‌تی باڵا ڕایسپارده‌ی داوه‌ و لایه‌نه‌ ته‌ندروستییه‌ تایبمه‌تمه‌نده‌كانیش جه‌ختیان له‌سه‌ر كردووەته‌وه‌، با ئه‌وانه‌شمان له‌ بیربێت كه‌ به‌ ویستی خودا و كۆششی كارمه‌ندانی ته‌ندروستی كه‌ له‌ پێشه‌وه‌ی به‌ره‌ی جه‌نگه‌ن، چاكبوونه‌وه‌ و له‌ ڤایرۆسه‌كه‌ ڕزگاریان بووه‌، ئێستاش له‌سه‌ر ئاستی جیهانی، كۆششی ماندوونه‌ناسانه‌ ده‌كرێت له‌ پێناو دۆزینه‌وه‌ی دژه‌ ڤایرۆسه‌كه‌ و چاره‌سه‌ری پێویستی په‌تاكه‌.

جارێكى دیكه‌ دووپاتى ده‌كه‌مه‌وه‌ كه‌ پێویسته‌ دووركه‌وینه‌وه‌ له‌ ترس و دڵه‌ڕاوكێ، پابه‌ندبین بە ڕێنماییه‌ ته‌ندروستییه‌كان، به‌لایه‌نی كه‌مه‌وه‌ دوو مه‌تر له‌ خه‌ڵكانی دیكه‌وه‌ دووربین، مانه‌وه‌ له‌ماڵه‌وه‌ و دووركه‌وتنه‌وه‌ له‌ تێكه‌ڵبوون، هه‌روه‌ها له‌كاتى هه‌ستكردن به‌ ده‌ركه‌وتنى نیشانه‌ دیاره‌كانى په‌تاى كۆرۆنا، سه‌ردانی لایه‌نه‌ ته‌ندروستییه‌ پەیوه‌ندیداره‌كان بكه‌ین.

وه‌ك ده‌زانین كه‌ ئه‌م پابه‌ندبوونه‌ ئه‌ركێكى ئاسان نییه‌، كاریگه‌رى ئابوورى و كۆمه‌ڵایه‌تیش به‌سه‌ر ژیانی خه‌ڵك و ئازادی جوڵه‌ و كاركردنیانه‌وه‌ جێدێڵێت، به‌ڵام ئه‌وانه‌ی باسكران، پێداویستی گرنگی قۆناغه‌كه‌ن و ده‌بێت دامه‌زراوه‌كانی ده‌وڵه‌ت خۆیانی بۆ ئاماده‌ بكه‌ن،ده‌بێت هه‌ماهه‌نگى كۆمه‌ڵایه‌تى به‌رفراوان ڕێكبخرێت بۆ كه‌مكردنه‌وه‌ى بارگرانییه‌كان له‌سه‌ر شانی خه‌ڵكانی كه‌مده‌رامه‌ت و كرێنشین و كرێكاران،به‌ڕێز و نرخاندنشه‌وه‌ له‌و ده‌ست پێشخەرییانە ده‌ڕوانین،كه‌ مه‌رجه‌عیه‌ته‌ ئاینییه‌كان و ڕێكخراوه‌ فریاگوزارییه‌كان و كه‌سایه‌تییه‌ كۆمه‌ڵایه‌تییه‌كان و چالاكوانان له‌م بواره‌دا پێشكه‌شیان كردووه‌.

پشتیوان به‌خودا،پێكه‌وه‌ ئه‌م قه‌یرانه‌ تێده‌په‌ڕێنین، ئه‌ویش به‌ یه‌كخستنى هه‌وڵه‌كانى پێكه‌وییمان و هه‌ماهه‌نگى و یارمه‌تیدانى هێزه‌كانى ئاسایش، بۆ ئه‌وه‌ى ئه‌ركه‌كانى خۆیان به‌باشى ڕاپه‌رێنن، و پشتیوانیكردنى تیم و یه‌كه‌ ته‌ندروستییه‌كان تا ئه‌ركه‌كانیان به‌باشى به‌ڕێوه‌به‌رن، هه‌روه‌ها له‌ ڕێگه‌ی ده‌ستبارگرتنی نێوان (ده‌وڵه‌مه‌ند و هه‌ژار، به‌ڕێوه‌به‌ر و فه‌رمانبه‌ر ، باوك و خانه‌واده‌كه‌ى).

خۆشه‌ویستان..

وڵاته‌كه‌مان ڕووبه‌رووى په‌تایه‌كى جیهانى ده‌بێته‌وه‌، هاوكات لێكترازانى سیاسى مه‌ترسیدار له‌ ئارادان،‌ ئه‌مه‌ش به‌هۆى نه‌بوونى حكومه‌تێكى خاوه‌ن ده‌سه‌ڵاتى ته‌واو، داوا له‌ ڕۆڵه‌كانى گه‌له‌كه‌مان ده‌كه‌ین یه‌كڕیزبن،له‌ پێش هه‌موو شیانه‌وه‌ داوا له‌ هێز و لایەنە‌ سیاسییه‌كان ده‌كه‌ین كه‌ یه‌كڕیز و هه‌ماهه‌نگبن،له‌ به‌رامبه‌ر ئه‌و ئاڵه‌نگارییانه‌ى گه‌له‌كه‌مان ڕووبه‌رووى ده‌بێته‌وه‌ بۆ ده‌ربازبوونى وڵات له‌و بارگرژییه‌ سیاسییانەی  چه‌ند مانگى ڕابردوو.

به‌ داخه‌وه‌ ده‌ڵێین:ئه‌م دۆخه‌ هه‌ستیاره‌، پێویسته‌ له‌سه‌ر هه‌مووان به‌رپرسیارییه‌تییه‌كه‌ى هه‌ڵبگرن، به‌رپرسیارییه‌تییه‌ك كه‌ گه‌له‌كه‌مان بۆ به‌ره‌نگاربوونه‌وه‌ی قه‌یرانه‌كان خستویه‌تییه‌ سه‌رشانى.
سڵاو رێز و ستایش بۆ تیم و یه‌كه‌ ته‌ندروستییه‌كان له‌ پزیشك و په‌رستار و ده‌رمانساز و شاره‌زاو یاریده‌ده‌ر و ته‌كنیكى له‌ ته‌واوى وڵات،كه‌ شه‌و و ڕۆژیان خستۆته‌ سه‌ر یه‌ك،بۆ چاودێریكردن و چاره‌سه‌ركردنى تووشبووان، تاھەرچی زووە پشت به‌خودا چاك ببنەوە.

سڵاو خۆشه‌ویستى و شانازیش بۆ هێزه‌كانى سوپا و ئاسایش و ھێزەکانی پێشمەرگە له‌سه‌رتاسه‌رى وڵات،بۆ تاك به‌تاكى ئاسایش و پۆلیس كه‌ به‌ دڵسۆزى ئه‌ركه‌كانیان ڕاده‌په‌رێنن بۆ پارێزگاریكردن له‌ ئاسایشى ته‌ندروستى له‌ ته‌واوى گه‌ڕه‌ک و گوند و شاره‌كان،له‌ هه‌مان كاتیشدا، له‌سه‌ر سنور و سه‌نگه‌ره‌كانى له‌ به‌گژاچوونه‌وه‌ى تیرۆر، به‌رگرى له‌ ئاسایش و ئارامی و داھاتووی گه‌له‌كه‌مان ده‌كه‌ن.

سڵاو بۆ دایكان لە تەواوی عێراق و کوردستان،كه‌ ڕۆڵه‌كانیان له‌ ئامێز ده‌گرن و فێرى بنه‌ماى ته‌ندروستیان ده‌كه‌ن بۆ خۆپارێزیان له‌ ڤایرۆسه‌كه‌،سڵاو له‌ هه‌ر باوكێك – كه‌ ته‌نها بۆ كاری زۆر پێویست نه‌بێت- پێودانگى نه‌چوونه‌ ده‌ره‌وه‌ له‌ ماڵ ڕێكده‌خات بۆ كه‌مكردنه‌وه‌ى ترس و دڵه‌ڕاوكێى خانه‌واده‌كه‌ى.

سڵاو بۆ هه‌موو گەنجان له‌ كچان و كوڕان،كه‌ پابه‌ندن به‌ ڕێنماییه‌ ته‌ندروستییه‌كان،كه‌ له‌ ڕێگه‌ى تۆڕى كۆمه‌ڵایه‌تىیه‌كانه‌وه‌ هۆشیارى بڵاو ده‌كه‌نه‌وه‌ و ده‌ستپێشخه‌رى باش ده‌كه‌ن بۆ یارمه‌تیدانى خاوه‌ن پێداویستییه‌كان،ئە‌و ده‌نگۆ و پروپاگه‌ندانه‌ش‌ ڕه‌تده‌كه‌نه‌وه‌ كه‌ ترس و خه‌مۆكى له‌ نێو هاوونیشتمانیاندا بڵاو ده‌كاته‌وه‌،

گه‌له‌كه‌مان به‌ هۆشیارى و ژیرى و یه‌كڕیزى و زانست و ڕه‌سه‌نى و دان به‌خۆداگرییه‌كه‌ى،به‌سه‌ر په‌تاى كۆرۆنا سه‌رده‌كه‌وێت،هه‌روه‌ك چۆن سه‌ركه‌وت به‌سه‌ر په‌تاى تیرۆردا.

(فَإِنَّ مَعَ الْعُسْرِ يُسْرًا - إِنَّ مَعَ الْعُسْرِ يُسْرًا)
خودا پارێزه‌ر و چاودێرتان بێت.. ته‌ندروستى و سه‌لامه‌تى بۆ ئێوه‌ و خانه‌واده‌ و خۆشه‌ویستانتان.
شیفا و زوو چاكبوونه‌وه‌ش بۆ نه‌خۆش و تووشبووان
به‌زه‌یى و ڕه‌حمه‌ت و نه‌مرى بۆ شه‌هیدان
دووبارە سڵاوی خودای گەورەتان لێبێت


Presedent

هەواڵی پەیوەندیدار

هەڵبژاردە

رۆژمێری چالاکیەکان