لە وتارێکدا لە یادەوەری كارەساتی عاشورادا... سەرۆك كۆمار: با شوێنپێهەڵگری رێچكەو رێبازەكەی حوسەینی كوڕی عەلی (ع) بین لە خزمەتكردنی گەلی عێراق و دوورخستنەوەی لە هەموو خراپەكاری و پیلانگێڕییەك

2020/08/30

سەرۆک کۆمار ئاماژەی بەوەشكردووە كە ئیمامی حوسەین (ع) هێمایەكە بۆ ئازادخوازی و بەیەكەوەژیان و ئاشتەوایی.

سەرۆك كۆمار د. بەرھەم ساڵح، ئەمڕۆ شەممە ٢٠٢٠/٨/٢٩ لە وتارێکدا لە یادى کارەساتی شەهیدبوونی ئیمامی حوسێن (سەلامی خوای لێ بێت) لە رووداوە كارەساتبارەكەی كەربەلادا (ئەلتەیف)، پرسەنامەیەكی ئاڕاستەی موسوڵمانانی عێراق و جیهان كرد.

سەرۆك كۆمار ئاماژەی بەوەشداوە لەمڕۆدا عێراق بە قۆناغێكی هەستیار و مەترسیداردا تێدەپەڕێت، سەرباری ئەوەی عێراقییەكان ئازایانە و دلێرانە لە رێچكەی كاروانی بێبەشی و ئێش و ئازارێكی دوورمەودا بەردەوامن و رێدەكەن، چاویشیان لە دادپەروەری و سەرورەی یاسایە، دەیانەوێت كۆتایی بە گەندەڵی بێنن و ژیانێكی شكۆمەندانە بۆ خۆیان دەستەبەر بكەن.

سەرۆك كۆمار جەختی لەوەش كردەوە كە پێویستە وەڵامدەرەوەی بەركەوتی نیشتمانی بین لە بواری چاكسازیدا، بەوەی لە هەڵبژاردنی پێشوەختدا پشت و پەنامان گەل بێت، كەشێكی پڕمتمانەداری دوور لە ساختەكاری و گزیكاری بڕەخسێنین، ئەمەش پێویستی بە دابینكردنی پێداویستییە تەكنییكی و یاساییەكان هەیە، تاوەكو عێراقییەكان لەوە دڵنیابکرێنەوە كە پڕۆسەكە راستگۆیانە و بە پاك و بێگەردییەوە بەڕێوەدەچێت، لەوەش دڵنیا بکرێنەوە كە ئازادانە و دوور لە هەموو دەستتێوەردان و ساختەكارییەك، دەتوانن مافە دەستوورییەكانیان لە دیاریكردنی چارەنووسی وڵاتەكەیان یان هەڵبژاردنی نوێنەرەكانیان و حكومەتەكەیاندا پیادە بكەن.

ئەمەش دەقی وتارەكەی سەرۆك كۆمارە:

بە ناوی خودای گەورە و میهرەبان

"وَلْتَكُن مِّنكُمْ أُمَّةٌ يَدْعُونَ إِلَى الْخَيْرِ وَيَأْمُرُونَ بِالْمَعْرُوفِ وَيَنْهَوْنَ عَنِ الْمُنكَرِ ۚ وَأُولَٰئِكَ هُمُ الْمُفْلِحُونَ" (صدق الله العظيم)

گەلی عێراقی سەربەرز
ئازادیخوازانی وڵات
سڵاوی خوای گەورەتان لێ بێت

لە دەستپێكی مانگی موحەڕم و عاشورای غەمگیندا، لەو كارەساتە جەرگبڕەی لە جەنگى كەربەلادا رووداوی (ئەلتەف) بەسەر حوسەینی كوڕی عەلی نەوەی پێغەمبەردا (د.خ) هات، پۆلێك لە یارو یاوەرانی لە ئەهلی بەیت لەگەڵیدا شەهیدبوون، پێم خۆش بوو لەو یادەوەرییە غەمگینەدا، هاوسۆز و هاوخەمی گەلەكەمبم و دەنگم بخەمە پاڵ دەنگیان و دڵنەواییان بكەم.

حوسێن-ی كوڕی ئیمام عەلی (سەلامی خودای لەسەر بێت)، ئەوکاتەو ئێستاش، بەو پڕۆژە چاكسازی و مرۆییەی هەڵگری بوو - نەك هەر بۆ خۆی بەڵكو بۆ دوژمنەكانیشی - لە یادەوەریماندا بە زیندووی دەمێنێتەوەو لەسەر رێبازەكەشی بەردەوام دەبین، لەو داستانە بێ وێنەیەدا، حوسەینی كوڕی عەلی (سەلامی خودای لێ بێت) سەرقافڵەی هاوژین و میراتگرانی پەیامی پیرۆزی پێغەمبەر (د.خ) بوو لە عەرەب و غەیرە عەرەب و گاور و رۆم و بەندە و ئازادەكان، ئەمەش بەڵگەیە لەسەر سەراپاگیری شۆڕشەكەی حوسێن (سەلامی خوای لێ بێت) كە بۆ هەمووان بوو، ئامانجەكەش بەرگریكردن بوو لە ستەملێكراون بێ رەچاوكردنی هیچ جیاكارییەكی نەژادی یان رەنگ یان تایەفەگەرییەك.

خوشك و برایانی زێدە ئازیز؛ لە یادەوەری ئەو رووداوە كارەساتبارە پڕ ماتەمینییەدا، دەرکەوت ئەمڕۆش چەندە پێویستیمان بە مرۆڤبوون و دلێری و جوامێری و هەڵوێستی حوسەین هەیە لە بەرەنگاربوونەوەی ستەم و زۆرداری و پاڵپشتیكردنی ستەملێكراوان.

حوسەین هێمای ئازادیخوازی و بەیەكەوەژیان و ئاشتەوایی و تەباییە لەگەڵ خود و دەوروبەر، ئەو كۆكەرەوەی هەمووانە، لە سنوری ئاینزاییەك یان تایەفەیەك یان نەتەوەیەكدا قەتیس نابێت، ئەو لە شۆڕشگێڕێکەوە بووە بەقوتابخانەیەكی پێگەیاندنی شۆڕگێڕان، لە باوەڕدارێكەوە بووە هێمایەك بۆ باوەڕداری، لە چاكسازێكەوە بووە هێمایەك بۆ چاكسازی.

رۆڵە ئارمگرتووەكانی گەلی عێراقی سەربەرز

یادە كارەستبارە جەرگبڕەكەی عاشورای ئەمساڵ لە ئان و ساتێكدایە كە جیهان بەدەست تەنگژەیەكی گەورەوە دەناڵێنێت و نوقمی ململانێكان بووە، لە سایەی تەشەنەكردنی ڤایرۆسی كۆرنادایە كە هەموو كەرتە جۆراوجۆرەكانی ژیانی خەڵكی داپۆشیووە، كەچی لە سایەی ئەو ڤایرۆسە نەگریسەدا گەلەكەمان سەلماندی كە لەسەر رێچكە و رێڕەووی حوسەین- ن (سەلامی خودای لێ بێت) لەوەی دەستباری كۆمەڵایەتی بۆ یەكتر دەگرن و دەستگیرۆیی هەژار و نەداران دەكەن، سەرقافڵەی ئەو داستانە پڕ بەهایەش سوپایەك لە كارمەندانی تەندروستین لە بەدەنگەوەهاتنیان بۆ ئێش و ئازاری نەخۆش و بەركەوتووانی ڤایرۆسەكە.

لەمڕۆدا عێراق بە قۆناغێكی هەستیار و مەترسیداریدا تێدەپەڕێت، سەرباری ئەوەی عێراقییەكان ئازایانە و دلێرانە لە رێچكەی كاروانی بێبەشی و ئێش و ئازارێكی دوورمەودا بەردەوامن و رێدەكەن، چاویشیان لە دادپەروەری و سەرورەی یاسایە، دەیانەوێت كۆتایی بە گەندەڵی بێنن و ژیانێكی شكۆدارانە بۆ خۆیان دەستەبەر بكەن، ئەوان چاویان لەوەیە دەوڵەتێكی تواناداری خاوەن سەرورەی تەواو بۆ مەڕجەع بێت و پایەكانیشی بچەسپێنن، چاویان لەوەیە دەوڵەتێكی خاوەن سەروەری تەواوی پابەند بە دەستوور و یاساكان سەرقافڵەیان بێت. 

بۆیە زۆر پێویستە وەڵامدەرەوەی بەركەوتی نیشتمانی بین لە بواری چاكسازیدا، بەوەی لە هەڵبژاردنی پێشوەختدا پشت و پەنامان گەل بێت، كەشێكی پڕمتمانەداری دوور لە ساختەكاری و گزیكاری بڕەخسێنین، ئەمەش پێویستی بە دابینكردنی پێداویستییە تەكنییكی و یاساییەكان هەیە، تاوەكو گەلی عێراق لەوە دڵنیابن كە پڕۆسەكە راستگۆیانە و بە پاك و بێگەردییەوە بەڕێوەدەچێت، لەوەش دڵنیابن كە ئازادانە و دوور لە هەموو دەستتێوەردان و ساختەكارییەك، دەتوانن مافە دەستوورییەكانیان لە دیاریكردنی چارەنووسی وڵاتەكەیان یان هەڵبژاردنی نوێنەرەكانیان و حكومەتەكەیاندا پیادە بكەن.

ئەم یادە كارەساتبارە زەنگێكی وریاكەرەوەیە بۆ ئێمە و هەموو لایەنە ناكۆك و لایەنە هاوبەشەكان كە رێچكەكەی حوسەین (سەلامی خودای لەسەر بێت) بگرینەبەر و لێی لانەدەین و شوێنپێی هەڵگرین، هەر بە گرتنەبەری ئەو رێچكەیەش خزمەتی گەلەكەمان بكەین و لەگەڵی بین لە بونیاتنانی نیشتمانەكەمان و دوروخستنەوەی خراپەكاری و پیلانگێڕییەكانی دوژمنەكانی، پێویستە چیمان لەدەست بێت بیكەین لە پێناو سوككردنی ئێش و ئازارەكانی گەلی عێراق كە شایستەی هەموو چاكەكاری و سەقامگیری و ئارامی و پەرەسەندنێكە.

خودا پاداشتی بە خێری ئەوانە بداتەوە كە ماتەمگێڕ و هاوخەمی نەوە نازدارەكەی پێغەمبەری (د.خ) ی پێشەوامانن، پرسە و سەرەخۆشی خۆشم ئاڕاستەی بۆ مەڕجەع باڵای نەجەف و هەموو چاكەخوازانی جیهان دەكەم كە پەندو ئامۆژگارییان لە رێبازەكەی حوسەین (سەلامی خوای لەسەر بێت) وەرگرتووە و لەسەر رێچكە و رێبازو پەیامەكەی بەردەوامن.
داواكارم لە پەروەردگاری مەزن:

-عێراق و گەلەكەی و سەرجەم هێزە ئەمنییەكانی لە هەموو خراپەكارییەك بپارێزێت.
-بەزەیی و میهرەبانی پەروەردگار بڕژێتە سەر گیانی شەهیدەكانمان.
-عێراق و گەلی عیراق لە سایە و پشتیوانی پەروەردگاری مەزندابن.
-دووبارە سڵاوی خوای گەورەتان لێ بێت.


Presedent

هەواڵی پەیوەندیدار

هەڵبژاردە

رۆژمێری چالاکیەکان