سەرۆک کۆمار بروسکەیەکی ماتەمینی لە میری کوەیت پێگەیشت

2021/01/22


د. بەرهەم ساڵح، سەرۆك كۆماری عێراق بروسکەیەکی ماتەمینی لە شێخ نەواف ئەحمەد جابر سەباح، میری کوەیت پێگەیشت، سەبارەت بە تەقینەوە تیرۆریستییەکانی گۆڕەپانی تەیەران لە بەغدا، لەو بروسەكەیەدا میری کوەیت بە توندی سەركۆنەی ئەو کارە تیرۆریستییەی كردووە، ھاوکات هاوخەمی خۆی و وڵاتەكەشی بۆ گەلی عێراق دەربڕیوە.

دەقی بروسكە ماتەمینییەكە:

"برای ئازیز و خۆشەویستم 
جەنابی سەرۆك كۆماری عێراق د. بەرهەم ساڵح 

سڵاوی خوای گەورەتان لێ بێت

بەوپەڕی نیگەرانی و دڵتەنگییەوە هەواڵی كردەووە تیرۆرستییەکەی گۆڕەپانی تەیەڕان و قوربانییەكانی ئەو كردەوە تیرۆرستییەمان پێگەیشت. 

ئێمە وەك دەوڵەتی كوەیت زۆر بە توندی ئەو كارە تیرۆرستییە شەرمەزار و سەركۆنە دەكەین كە هاووڵاتییانی سڤیلی بێتاوانی بە ئامانج گرتووە، کە مەبەست لێی تێكدانی ئارامی و سەقامگیری دەوڵەتی عێراقی برایە، ئێمە هەڵوێستی نەگۆڕی دەوڵەتی كوەیت-تان بۆ دووپاتدەكەینەوە لە رەتكردنەوە و سەركۆنەكردنی هەموو جۆرە كارێكی تیرۆریستی، ھەروەھا پشتیوانی خۆمانتان بۆ دووپاتدەكەینەوە لە گرتنەبەری هەر رێوشوێنێك بۆ رووبەڕووبوونەوەی ئەو تاوانە قێزەوونانە.

بەو بۆنە خەمبارەوە بە ناوی خۆم و دەوڵەتی کوەیتەوە، سەرەخۆشی لە بەڕێزتان و گەلی عێراقی برا دەكەم، داوا لە پەروەردگاری مەزن دەكەم قوربانییەكان بە بەهەشتی بەرین شاد بكات، ئومێدی زوو چاكبوونەوەش بۆ  بەركەووتوانی ئەو كارەساتە دەخوازم، هیواخوازم خودای مەزن سەبووری كەسوكاری قوربانییەكان بدات.

رێز و خۆشەویستیم قبوڵ بفەرموون
نەواف ئەحمەد جابر سەباح
میری دەوڵەتی کوەیت"

Presedent

هەڵبژاردە