ژیاننامەی دكتۆر عەبدوللەتیف رەشید
خوێندن
دكتۆر عەبدوللەتیف رەشید ساڵی 1968 بڕوانامەی بەكالۆریۆسی لە ئەندازیاریی شارستانی لە زانكۆی لیڤەرپوول بەدەستهێناوە، پاشان بڕوانامەی ماستەری لە ساڵی 1972 دا لە بواری هایدرۆلیكدا بەدەستهێناوە، بڕوانامەی دكتۆرای لە هایدرۆلیكی ئاو لە ساڵی 1976 بەدەستهێناوە، هەردووكیشان لە زانكۆی مانچستەر.
كارنامەی سەرەتا
لە ساڵانی 1975-1976 لە كۆمپانیای ڕاوێژكاریی سێر ویلیام هالكرۆ و ئەسۆشیەیتیس كۆنسەڵتینگ فێرم لە لەندەن دامەزراوە.
لە شوباتی 1977 ڕووی لە سعودیە كرد بۆ سەرپەرشتیكردنی پڕۆژەی نیشتمانیی ئاودێری و گەشەپێدانی سعودیە.
دواتر ڕاسپێردراوە بۆ كاركردن لە سۆماڵ لە پڕۆژەی ئاودێریی باكور بۆ ئەنجامدانی ڕووپێو و هەڵسەنگاندنی پڕۆژەكە لەنێوان ساڵانی 1979- 1981.
سەرۆكی پڕۆژەی ڕێكخراوی نێودەوڵەتیی خۆراك و كشتوكاڵ - پڕۆژەی گەشەپێدانی كشتوكاڵی بووە لە دۆڵی توبان لە یەمەن لە نێوان ساڵانی 1981-1982 دا و لە بەنداوی دۆڵی جیزان و پڕۆژەی ئاودێری لە نێوان ساڵانی 1982 – 1983دا.
دكتۆر لەتیف ڕەشید بە بەڕێوەبەری پڕۆژەی ڕێكخراوی نێودەوڵەتیی خۆراك و كشتوكاڵ هەڵبژێردراوە و بووە بە سەرپەرشتیاری ژمارەیەك پسپۆڕی تایبەتمەند لە ڕێكخراوی خۆراك و كشتوكاڵی سەر بە نەتەوە یەكگرتووەكان (فاو) لە نێوان ساڵانی 1983 - 1986.
دواتر لە ساڵی 2911دا دەبێتە كاندیدی رەسمی بۆ پۆستی بەڕێوەبەری گشتیی ڕێكخراوی (فاو).
پرۆفایەڵی كەسی
هاوسەری شاناز ئیبراهیم ئەحمەد، ئەندامی مەكتەبی سیاسیی یەكێتیی نیشتمانیی كوردستانە، كە سیاسەتمەدارێكی دیار و مرۆڤدۆستێكی چالاكە و بە نوسینە سیاسیەكانی ناسراوە. خاوەنی دوو كوڕ و كچێكن.
د. لەتیف ڕەشید بە 3 زمان قسە دەكات: عەرەبی، كوردی و ئینگلیزی.
پرۆفایلی پیشەیی
د. لەتیف رەشید ئەندازیارێكی رێگەپێدراوە، هاوكاری پەیمانگەی ئەندازیارانی شارستانیی بەریتانیایە، ئەندامی كۆمیسیۆنی نێودەوڵەتیی ئاودێری و ئاوەڕۆیە، سەرۆكی كۆمیسیۆنی نێودەوڵەتی ئاودێری و ئاوەڕۆی عێراق، ئەندامی كۆمەڵەی ئەندازیارانی عێراقییە. پەیوەندیی لەگەڵ چەندین كۆمەڵە و كۆڕبەندیی زانستیی تریشدا هەیە.
دكتۆر لەتیف ڕەشید لە ساڵی 1992دا ئەندامی دەستەی دامەزرێنەری مناڵپارێزی كوردستان بووە، كە ڕێكخراوێكی خێرخوازیی تایبەت بە پاراستنی مافی منداڵانە.
دكتۆر رەشید چەندین توێژینەوەی زانستی و نووسینی بە هەردوو زمانی عەرەبی و ئینگلیزی لەسەر سەرچاوەكانی ئاوی عێراق بڵاوكردۆتەوە.
بەم دواییەش وەك پرۆفیسۆری زانكۆی ئێكستەر دەستنیشانكراوە و بەردەوامە لەسەر هاوكاریكردنی ناوەندە ئەكادیمییەكان، لەنێویاندا زانكۆی سلێمانی.
پرۆفایلی سیاسی
مێژووی سیاسی دكتۆر عەبدوللەتیف ڕەشید دەگەڕێتەوە بۆ شەستەكانی سەدەی ڕابردوو، ئەو دەمەی پەیوەندیی بە ریزەكانی پارتی دیموكراتی كوردستانەوە كرد و بوو بە ئەندامێكی كارا، و سەرپەرشتیی رێكخراوی قوتابیانی كوردستانی كردووە لە ئەوروپا. ساڵی 1975بەشدار بووە لە دامەزراندنی یەكێتیی نیشتمانیی كوردستاندا. دواتر بۆتە نوێنەری یەكێتیی نیشتمانیی كوردستان، و نوێنەرایەتیی یەكێتیی لە ژمارەیەك وڵاتی تری ئەوروپا كردووە.
لە بەردەوامیی كاری سیاسییدا، وەك ئەندامی ئەنجومەنی سەركردایەتیی جێبەجێكاری كۆنگرەی نیشتمانی عێراق هەڵبژێردراوە، كە ڕۆڵێكی سەرەكیی لەناو ئۆپۆزسیۆندا هەبوو، ئەو ئۆپۆزسیۆنەی كە لە ساڵی 2003 دا ڕژێمی عێراقی ڕووخاند.
لە مانگی كانونی دووەمی 2003 تا كانونی دووەمی 2011 وەزیری سەرچاوەكانی ئاوی عێراق بووە، و یەكێك بووە لەو وەزیرانەی عێراق كە درێژترین ماوە لە پۆستەكەیدا ماوەتەوە. دەستكەوتە دیارەكانی لەم ماوەیەدا بریتی بوون لە نۆژەنكردنەوە و بنیاتنانەوەی ژێرخانی ئاویی عێراق، و بوژاندنەوەی زۆنگاوە بەناوبانگانی عێراق كە پێشتر وشككرابوون.
وەزارەتی سەرچاوەكانی ئاو، ئەو دەمەی دكتۆر لەتیف ڕەشید بۆ دوو خول وەزیر بووە، لە بەرامبەر دەستكەوتەكانیدا خەڵات كراوە.
لە كۆتایی ساڵی 2010 تا 31 ی تشرینی یەكەمی 2018 ڕاوێژكاری باڵای سەرۆك مام جەلال بووە.
لە 13ی تشرینی یەكەمی 2022 بە سەرۆك كۆماری عێراق هەڵبژێردرا