وتەی سەرۆک کۆمار


دکتۆر بەرهەم ئەحمەد ساڵح قاسم، سەرۆک کۆماری عێراق.

لە 2-ی ئۆکتۆبەری ساڵی 2018 بە زۆرینەی دەنگ لە ئەنجومەنی نوێنەرانی عێراق وەک سەرۆک کۆماری عێراق هەڵبژێردرا.

لە ساڵی 2004 پۆستی جێگری سەرۆکی ئەنجومەنی وەزیرانی لە حکومەتی کاتی عێراق وەرگرت، دواتر لە ساڵی 2005 وەزیری پلاندانی عێراقی لە حکومەتی راگوزەر وەرگرت.

لە ساڵی 2006 پۆستی جێگری سەرۆکی ئەنجومەنی وەزیرانی لە یەکەم حکومەتی هەڵبژێردراو وەرگرت و سەرپەرشتی دۆسیەی ئابووری و سەرۆکایەتی لیژنەی ئابووری کردووە.

لەمیانی سەرپەرشتیکردنی دۆسیەی ئابووری لە حکومەتی عێراقیدا، پێشنیازی "دەستپێشخەری پەیماننامەی نێودەوڵەتی لەگەڵ عێراق" کرد، کە پەیماننامەیەک بوو بۆ پابەندبوونی هاوبەشی نێوان عێراق و کۆمەڵگەی نێودەوڵەتی کە ئامانج لێی یارمەتیدانی عێراق بوو، تاوەکو دووبارە لە سەرپێ خۆی بوەستێ و کەرتەکانی ئاسایش و سیاسی و ئابووری و کۆمەڵایەتی پەرەپێ بدات.

ساڵی 2009 سەرپەرشتی ھەڵبژاردنی ھەرێمی کوردستانی کرد، وەک سەرۆکی لیستی کوردستانی لە ھەرێم و پاشان راسپێردرا کە کابینەی شەشەمی حکومەتی ھەرێمی کوردستان دامەزرینێ و بووە سەرۆکی حکومەتی ھەرێمی کوردستان لە نێوان ساڵەکانی 2009 بۆ 2011 و بەرنامەیەکی چروپڕی دارێژا بۆ ئەوەی بونیادنان و خۆشگوزەرانی لە کەرتەکانی خزمەتگوزاری گشتی و خوێندن و تەندروستی و بونیادنانەوە لە ھەرێمی کوردستان سەربخات.

پێشتریش لە ساڵی 2001 بۆ 2004 سەرۆکایەتی حکومەتی ھەرێمی کوردستان - ئیدارەی سلێمانی وەرگرت بوو.

لە کۆتاییەکانی ساڵی 1976 بە نهێنی پەیوەندیکردووە بە ریزەکانی یەکێتیی نیشتمانیی کوردستان و تا پلەی جێگری سکرتێری گشتی یەکێتیی نیشتمانیی کوردستانی وەرگرتووە.

لە ساڵی 1979 لەلایەن رژێمی پێشووی بەعسەوە دەستگیرکراوە جارێک لە ھەیئەی لیکۆڵێنەوەی تایبەتی کەرکوک و جارێکی دیکەش لە هەواڵگری سەربازی لە سلێمانی.

بڕوانامەی بەکالۆریۆسی لە ئەندازیاری مەدەنی و بیناسازی لە زانکۆی کاردیف لە بەریتانیا بەدەست هێناوە و بڕوانامەی دکتۆراشی لە ئامار و تیۆری هەڵسەنگاندن لە بواری ئەندازیاری دەریای لە زانکۆی لیڤەرپوڵ لە بەریتانیا بەدەست هێناوە.

لە بوارەکانی رۆشنبیری و پشتیوانی لە کۆمەڵی مەدەنی و چالاکی جۆرا و جۆری هەبووە و دامەزرێنەری زانکۆی ئەمریکییە لە عێراق - سلێمانی.

لە 8-ی ئەیلولی 1960 لە سلێمانی لەدایکبووە و خێزاندارە و خاوەنی کچ و کوڕێکە.

شارەزای تەواوەتی لە زمانەکانی کوردی و عەرەبی و ئینگلیزی هەیە.

هەڵبژاردە

رۆژمێری چالاکیەکان